निर्वाचन आयोगमा देउवाको हस्ताक्षर पुगेपछि कांग्रेसमा लफडा

काठमाडौं – कांग्रेसको महाधिवेशन निर्वाचन अगाडि कि पछाडि भन्ने विवाद यथावत् नै रहेका बेला अर्को विवाद सुरु भएको छ ।
माघ ११ को राष्ट्रियसभा र फागुन २१ को प्रतिनिधिसभा निर्वाचन प्रयोजनका लागि निर्वाचन आयोगमा सभापति शेरबहादुर देउवाकै नाम र हस्ताक्षर राखेर दल दर्ता भएपछि कांग्रेसभित्र महाधिवेशनको विवाद झनै चुलिएको छ ।
कांग्रेस महामन्त्री गगन थापाले भने निर्वाचन अगाडि नै महाधिवेशन गरेर नयाँ नेतृत्वमा चुनाव लड्ने बताए । ‘बिहानै धेरै साथीहरूले सोधिरहनुभएको छ पार्टीले वर्तमान सभापतिज्यूकै हस्ताक्षरमा चुनाव लड्ने भएको हो ? मैले भनेँ होइन । अब विधानबमोजिम समयभित्रै विशेष महाधिवेशन हुन्छ । त्यहीँबाट नयाँ सभापतिको निर्वाचन हुन्छ । नयाँ सभापतिको हस्ताक्षरसहित निर्णय सच्चिएर निर्वाचन आयोगमा जान्छ ।
नयाँ नीति र नेतृत्वसहित त्यही हस्ताक्षरबाट पार्टी चुनाव लड्छ’, कांग्रेस महामन्त्री थापाले भने ।

आइतबार निर्वाचन आयोगमा देउवाकै नाम पठाउनुको अर्थ हो, आगामी प्रतिनिधिसभा निर्वाचनमा आफ्नै हस्ताक्षरबाट टिकट वितरण गर्नु हो । निर्वाचन अगाडि विशेष वा नियमित महाधिवेशन हुन सकेन भने देउवाले नै टिकट वितरण गर्नेछन् । त्यसो त देउवाले २८ असोजमै उपसभापति पूर्णबहादुर खड्कालाई कार्यवाहक सभापतिको जिम्मेवारी दिएर सक्रिय राजनीतिबाट अलग हुने सन्देश दिए पनि आयोगको हस्ताक्षरमा सभापतिकै नाम छ । तर, महामन्त्री थापाले भने नियमित नभएमा विशेष महाधिवेशनबाट पनि नेतृत्व परिवर्तन हुने उल्लेख गरेका छन् ।

कांग्रेस सभापति देउवा फेरि सक्रिय राजनीतिमा
संस्थापन पक्षका पूर्वपदाधिकारीसहित बहुमत सदस्य निर्वाचनअगाडि कुनै पनि हालतमा महाधिवेशन गर्न नहुने अडानमै छन् । निर्वाचन आयोगमा देउवाको नाम गएपछि सभापति आपैmंले अधिवेशन नचाहेको र आपैmंले टिकट बाँड्न चाहेको विषयमा महामन्त्री थापाले भनेका छन, ‘यही कारण हो, हामीले निर्वाचनअगाडि नै महाधिवेशन भनेको । अब विशेष महाधिवेशनको विकल्प छैन । कुरा स्पष्ट छ । अलमलमा नपरौं ।’

कानुनतः निर्वाचन आयोगमा नाम पठाउने सन्दर्भमा सभापतिकै नाम पठाउनुपर्छ भन्ने छैन । केन्द्रीय सदस्य पदाधिकारी जसको नाम पठाउँदा पनि हुने व्यवस्था छ । त्यसमा पनि पार्टी सभापति देउवाले आफ्नै नाम राखेर पठाए । यसबाट के पनि बुझिन्छ भने उनी फेरि सक्रिय राजनीतिमै रहन चाहन्छन् । कांग्रेसकै एक पदाधिकारी भन्छन्, ‘सभापतिजीले सक्रिय राजनीति छाडेको भनेर जसरी बुझियो त्यो गलत बुझाइ थियो । उहाँ अहिले पनि शक्तिमै हुनुहुन्छ । र शक्ति गुम्न दिनुहुन्न । उहाँले आफ्नै नाम र हस्ताक्षरको नमुनासहित दल दर्ता गर्नुका पछाडि सक्रिय हुने मनसाय रहेको भनेर पनि बुझिन्छ ।’

त्यस्तै, अर्का महामन्त्री विश्वप्रकाश शर्माले पार्टीको विशेष महाधिवेशन र महाधिवेशनको विषयमा पार्टीका नेताहरूलाई सम्बोधन गर्दै भनेका छन्, ‘पार्टीको महाधिवेशनका लागि दुई विकल्प छन् । अझै पनि विशेष महाधिवेशन सम्भव भएको तर त्यसका लागि सबै एक भएर लाग्नु पर्नेछ ।’

‘पहिलो विकल्प पुस अन्तिम साताका लागि नियमित महाधिवेशन गर्नेगरी अबको बैठकबाट कार्यतालिका निर्माण गर्ने’, उनले भने, ‘महाधिवेशन तयारी क्रममा केही दिन समय नपुग्न सक्ने अवस्था देखिए, थप १५ दिन समय लिएर महाधिवेशन सम्पन्न गर्ने ।’ त्यस्तै, उनले दोस्रो विकल्पको रूपमा ५४ प्रतिशत महाधिवेशन प्रतिनिधिले माग गरेको विशेष महाधिवेशनको मागलाई सम्बोधन नगरी पार्टी अघि बढ्न नसक्ने पनि धारणा राखे ।

‘दोस्रो विकल्प पार्टीका आदरणीय सभापतिज्यूले देशको परिस्थिति, पार्टीको अवस्था र समयको चाप बुझेर सुवर्णशमशेर पथ पछ्याउन सक्नुहुन्छ भन्ने मलाई लाग्छ । त्यो भनेको २०१४ सालमा झैं स्वयं सभापतिले मार्गप्रशस्त गर्ने’, उनले अगाडि भने, ‘त्यसले एकातर्फ पार्टीले निकास प्राप्त गर्छ, अर्कोतर्फ उहाँको सम्मान र अभिभावकीय भूमिकाले उचाइ पाउनेछ । ५४ प्रतिशत महाधिवेशन प्रतिनिधिको हस्ताक्षरलाई सम्बोधन नगरी पार्टी अघि जान सक्दैन । तब २०८२ मंसिर मसान्तमा विशेष महाधिवेशन, २०८३ मंसिरमा नियमित महाधिवेशन गर्न सकिनेछ ।