सिंहदरबार गेटमा दिनदिनै रमिता

काठमाडौं – केही दिनदेखि सिंहदरबारको गेटमा रमिता चलिरहेको छ। गेटको सुरक्षार्थ खटिएका प्रहरी र सिंहदरबार प्रवेश गर्ने समूहबीचको धकेलाधकेल र भिडभाडले उक्त क्षेत्र नै आतंकित बन्यो। मंगलबार दिउँसो पनि उक्त एरिया दिनभर तनावग्रस्त बन्यो। प्रधानमन्त्री सुशीला कार्कीले ज्ञापनपत्र बुझाउने समय नदिएको भन्दै आक्रोशित समूहले दिनभर सिंहदरबार परिसरमा प्रदर्शन गर्‍यो।
मिराज ढुंगाना नेतृत्वको जेन–जी समूह गिरफ्तारी दिने भन्दै मंगलबार दिउँसो सिंहदरबार परिसर पुगेको थियो। क्यामेरा र भिडियोग्राफर पनि सँगै लिएर गएको उक्त समूहले गेटपास नलिई सिंहदरबार प्रवेश गर्न खोजेपछि प्रहरीले रोकेको थियो। सिंहदरबार गेटमै प्रदर्शन गरेपछि दिनभर प्रहरी र प्रदर्शर्नकारीबीच धकेलाधकेल भएको थियो।
आक्रोशित समूहलाई प्रहरीले हनुमानस्थान हुँदै लखेट्थ्यो। उनीहरू पुनः हुरुरु सिंहदरबार गेट पुग्थे। यो बाटो भएर हिँड्ने यात्रुहरू दिनभर समस्यामा परे। त्यहाँ भएको प्रदर्शनका कारणले उक्त बाटो भएर हिँड्ने सवारीसाधनसमेत लामो समय जाममा परे।
जिल्ला प्रहरी परिसर काठमाडौंका प्रमुख रमेश थापाका अनुसार कुनै पनि समूहले निषेधित क्षेत्र प्रवेश गर्न पाउँदैनन्। सिंहदरबारवरिपरिको क्षेत्र निषेधित क्षेत्र हो। यहाँ हुलहुज्जत गर्न पाइँदैन। उक्त क्षेत्रको सुरक्षाका लागि प्रहरीले निषेधित क्षेत्रबाट प्रदर्शन गर्ने समूहलाई हटाएको हो। विरोध प्रदर्शन गर्ने समूहले सिंहदरबार गेट मात्रै होइन, विभिन्न मन्त्रालयभित्रै पुगेर पनि दबाब बढाइरहेका छन्। आ–आफ्ना माग पूरा गर्न दबाब बढाएका छन्।

विरोध प्रदर्शन मंगलबार मात्रै भएको होइन, विभिन्न माग राखी हरेक दिन प्रदर्शन भइरहेका छन्। माइतीघरमा धर्ना बसेका एक समूह छन्, उनीहरूको बेग्लै माग छ। जेन–जीका नाममा गठन भएका अनेक समूहले विभिन्न बहानामा प्रदर्शन गर्दा उपत्यकाको जनजीवन कष्टकर हुँदै गएको छ। अत्यधिक भिडभाडले ट्राफिक व्यवस्थापनमा कठिन हँुदा यात्रुहरू घण्टौं जाममा बस्नुपरेको छ।

सोमबार पनि सिंहदरबारमा विभिन्न ३ वटा समूहले प्रदर्शन गरे। एकथरी सिंहदरबारको गेटमै रोकिए, अर्कोथरीले प्रधानमन्त्री कार्यालयको प्रतीक्षा हलमा हुलहुज्जत गरे र तेस्रो समूह मागपत्र खल्तीमा राखेर सुटुक्क फर्कियो। ती समूह मंगलबार पनि सिंहदरबार गेटमा पुगेका थिए।

सोमबार प्रधानमन्त्री सुशीला कार्कीसमक्ष मात्रपत्र बुझाउन गएका मिराज ढुंगाना जेन–जीका विभिन्न समूहहरू त्यत्तिकै फर्किए। प्रधानमन्त्री कार्कीलाई भेट्न नपाएपछि उनीहरूले प्रधानमन्त्री कार्यालय परिसरमै होहल्ला र नाराबाजी गरे। अन्त्यमा सिंहदरबारको दक्षिण गेटमा मागपत्र टाँसेर फर्किएका थिए। यही समूहले मंगलबार दिनभर प्रदर्शन गर्‍यो। प्रहरी र प्रदर्शनकारीको भिडले घेरिएका मिराज ढुंगाना भन्दै थिए, ‘हामी थाकेका छैनांै, लडेका छैनौं। ’

मिराज ढुंगाना, रविकिरण हमाललगायत जेन–जी अगुवाहरू मागपत्र लिएर गएका थिए। उनीहरू कोही राजावादी जेन–जी थिए त कोही संविधान खारेजीको माग राख्ने जेन–जीहरू पनि थिए। यही भिडमा थिए जेन–जी अगुवा सुधन गुरुङदेखि सुप्रिया शाहीसम्म देखिएका थिए। सुधन गुरुङको समूह पनि विभिन्न मागपत्र लिएर सिंहदरबार पुगेको थियो।

देशभरि जेन–जीका नाममा अवाञ्छित समूह र व्यक्तिहरूले अराजकता मच्चाउन थालेपछि सरकार कठोर बन्न थालेको छ। प्रहरी कार्यालयले पनि कडाइ र निगरानी बढाइरहेको छ। गृहमन्त्री ओमप्रकाश अर्यालले अराजकता सिर्जना गर्ने कसैलाई पनि उन्मुक्ति नदिइने बताउँदै आएका छन्। गृहमन्त्रीले अहिलेको सरकार चुनावी सरकार भएकाले शान्तिपूर्ण रूपमा चुनाव गराउने वातावरण सिर्जना गर्नमा सरकार लागिपरेको बताएका छन्।

जिल्ला प्रहरी परिसर काठमाडौंका प्रवक्ता पवन कुमार भट्टराईले विरोध प्रदर्शन शान्तिपूर्ण रूपमा गर्नका लागि आग्रह गरेका छन्। उनी भन्छन्, हरेक दिनको प्रदर्शनले उपत्यकाको जीवनयापन नै कष्टकर बनेको छ। अवाञ्छित गतिविधि गर्ने, तोडफोड गर्ने, सरकारी सम्पत्ति जलाउने र फुटाउने कसैलाई पनि क्षम्य हुँदैन।