कालिकोटको पचालझरनाका बिद्यार्थीलाई लैंगिक हिंसा सम्बन्धी अनलाइन अभिमुखिकरण

कालिकोट – कालिकोट जिल्लाको पचालझरना गाँउपालिका स्थित १० वटा सामुदायिक बिद्यालयमा अध्यायनरत बिद्यार्थीहरुलाई प्रविधिको माध्यामबाट हुने लैंगिक हिंसा सम्बन्धि सचेतना जोगाउन अभिमुखिकरण गरिएको छ । जोन्ता क्लब काठमाडौँ र साईबर ब्युरोको समन्वयमा पचालझरना गाउँपालिकाका १० वटा विद्यालयका बिद्यार्थीलाई प्रविधिको प्रयोगबाट लैंगिक हिंसा तथा त्यसबाट जोगिने उपायहरू सम्बन्धी अनलाइन माध्यामबाट अभिमुखिकरण गरिएको हो ।
उक्त कार्यक्रममा प्रहरी नायक उपरीक्षक गजेन्द्र आचार्यले अनलाइन दुव्र्यवहार, ठगी, साइबर सुरक्षाका आधारभूत उपाय, पासवर्ड सुरक्षा, सामाजिक सञ्जाल प्रयोग गर्दा अपनाउनु पर्ने सावधानी तथा अनलाइन अपराधबाट सुरक्षित रहने व्यवहारगत सीपबारे जानकारी दिए । यस्तै अधिवक्ता सल्लु तिवारीले सूचना प्रविधिको माध्यमबाट हुने अपराध र त्यसको कानुनी उपचार सम्बन्धि कानुनी प्रावधानहरुको बारेमा जानकारी दिए ।
कार्यक्रमको समन्वय तथा प्राविधिक सहयोग जोन्ता क्लब काठमाडौँले गरेको थियो भने कोर्डिनेटरको भूमिकामा सार्बजनिक युवा सरोकार मञ्च फचालझरनाका अध्यक्ष जस बोगटीले गरेका थिए । उक्त कार्यक्रमको प्रायोजना एभरेष्ट बैंक लिमिटेड, गोल्छा ग्रुप तथा एनऐमबि बैंकले गरेका थिए।

कार्यक्रममा पचालझरना गाँउपालिका स्थित सरस्वती माध्यमिक विद्यालय भिट्टा, ज्ञानोदय माध्यमिक विद्यालय राम्नाकोट, पञ्चकन्या माध्यमिक विद्यालय बाँच्कोट, विद्यादेवी माध्यमिक विद्यालय मयकोट, पंगेलीदेवी माध्यमिक विद्यालय नुवाघर, सहिद स्मृति आवासीय माध्यमिक विद्यालय तिखार्ती, जनप्रिय माध्यमिक विद्यालय बोलुगाउँ, कालिका माध्यमिक विद्यालय खयरकोट, सरस्वती माध्यमिक विद्यालय सिकु र जनता माध्यमिक विद्यालय खार्दुका बिद्यार्थीहरु सहभागि भएका थिए । प्रशिक्षणमा बिद्यार्थीहरूले अनलाइन दुव्र्यवहार, ठगी, साइबर सुरक्षाका आधारभूत उपाय, पासवर्ड सुरक्षा, सामाजिक सञ्जाल प्रयोगका सावधानी तथा अनलाइन अपराधबाट सुरक्षित रहने व्यवहारगत सीप सिकेका छन्। जोन्ता क्लबले यस किसिमका कार्यक्रमले ग्रामीण क्षेत्रका बिद्यार्थीहरूमा डिजिटल सचेतना बढाउन मद्दत पुग्ने विश्वास व्यक्त गरेको छ।