नेपाल प्रहरीमा एसएसपीको दरबन्दी थप गर्ने गृहकार्य

काठमाडौं – नेपाल प्रहरीको एसएसपीमा प्रशासनतर्फ ५७ जना र प्राविधिकतर्फ २२ जनाको दरबन्दी छ। जसमा प्राविधिक २ र प्रशासनतर्फ ७ जना एसएसपीको दरबन्दी खाली छ। एसएसपी दरबन्दी पूरा गर्न सरकारले बढुवाको प्रक्रिया अगाडि बढाएको छ।
स्तै, डीआईजी पदमा जम्मा २७ जनाको दरबन्दी रहेको छ। जसमा प्रशासन २० र प्राविधिकतर्फ ७ जनाको दरबन्दी छ। यस्तै, एआईजी पदका लागि प्रहरीमा ९ जनाको दरबन्दी रहेको छ। जसमा १ जना प्राविधिक र ८ जना प्रशासनतर्फ छन्। प्राविधिकतर्फ प्रहरी अस्पतालको प्रमुखमा एआईजी रहने व्यवस्था रहेको छ।
प्रशासनतर्फको एसएसपी पदमा २ को दरबन्दी थप गर्ने पक्रिया अघि बढेको छ। यसका लागि प्रहरीकै प्राविधिकतर्फ भएको २२ वटा एसएसपी दरबन्दीमध्ये २ वटा दरबन्दी जनपथतर्फ मिलान गर्न लागिएको हो। नेपाल प्रहरीको केनाइन महासाखामा रहेको एसएसपी दरबन्दी र सवारी महासाखामा रहेको एसएसपी दरबन्दी प्रशासनतर्फ लगेर मिलान गर्न लागिएको हो।
सरकारले नेपाल प्रहरीको एसएसपी दरबन्दी थप गर्नका लागि ‘ओएन्डएम’ गर्ने प्रक्रिया अगाडि बढाउन स्वीकृति दिएको छ। सोमबार बसेको मन्त्रिपरिषद्को बैठकले नेपाल प्रहरीको संगठन तथा व्यवस्थापन सर्वेक्षण गर्न पूर्वस्वीकृति प्रदान गर्ने निर्णय गरेको थियो।
नेपाल प्रहरीका प्रवक्ता अभिनारायण काफ्लेका अनुसार हाल नेपाल प्रहरीमा ७९ हजार ५४१ जना प्रहरी कर्मचारी रहेका छन्। यो संख्यामा थपघट नगर्ने गरी अन्य आवश्यक पद थपघट गर्न सरकारले स्वीकृत गरेको हो। संगठनलाई आवश्यक दरबन्दी थपघट गर्ने गरी ‘ओएन्डएम’ गरी प्रतिवेदन तयार गरिनेछ।

नेपाल प्रहरीको अन्वेषण योजना विकास निर्देशनालयका प्रमुख दीपक रेग्मीका अनुसार प्रहरी प्रधान कार्यालयले यसअघि नै एसएसपी दरबन्दी मिलानका लागि आवश्यक पहल गरिरहेको थियो। यसमध्ये प्रहरीमै भएको दरबन्दीलाई आवश्यक ठाउँमा ल्याएर मिलान गर्न लागिएको हो।

अन्नपूर्ण पोस्ट्लाई प्राप्त सूचनाअनुसार आइजीपीको सचिवालयमा एक एसएसपी दरबन्दीको आवश्यकता रहेको छ। सीआईवीमा पनि एक जना एसएसपी पद थप गर्ने गरी दरबन्दी मिलान गर्न लागिएको हो। यसका लागि संगठनले केही एसएसपी पदको दरबन्दी नै थप गर्न माग गरेकोमा सरकारले थप गर्ने नभई मिलान गर्ने स्वीकृति दिएको हो।

प्रशासनतर्फ ७ जना एसएसपी पद अहिले खाली छ। यसअघिका ६ जना एसएसपी बढुवा भएर डीआईजी भएको र एक जनाले राजीनामा दिएपछि खाली रहेको थियो। यी पदपूर्ति गर्नका लागि १९ जना एसपीहरू प्रतिस्पर्धामा छन्। दरबन्दी थप गर्नका लागि प्रहरी प्रधान कार्यालयका प्रतिनिधि र गृह मन्त्रालयका सहसचिवस्तरीय बैठकले सिफारिस गरेको थियो।

प्रहरी संगठनले प्रहरी कर्मचारीको वृत्ति विकास र प्रगतिका लागि संगठनलाई आर्थिक भार नपर्ने गरी माथिल्लो पोस्टमा केही दरबन्दी थप गर्न लागेको बताएको छ। तर, सार्वजनिक भएका केही हल्लाहरूमा गृहमन्त्रीको व्यक्तिगत लाभका आफ्ना मान्छेलाई बढुवा गर्न प्रशासनतर्फ दरबन्दी बढाउन लागिएको आरोप लागेको छ। गृह मन्त्रालय स्रोतका अनुसार प्रहरी संगठनमा आवश्यक मात्रामा दरबन्दी नै छैन।

२०७५ सालदेखि दरबन्दी थप गरिएको छैन। पछिल्लो समय देशमा बिग्रँदै गएको शान्ति सुरक्षालाई कमान्ड गर्नका लागि केही दरबन्दी थप गर्न आवश्यक छ। नाम नभन्न सर्तमा बहालवाला एक डीआईजी भन्छन्, ‘प्रहरीले काम गर्न सकेन भनेर मात्रै भएन नि। हामीले प्रहरीमा पाँच हजार थप दरबन्दी थपौं भनेर भनिरहेका छौं। तर, सरकारले सुन्ने हैन। २०७४/७५ सालदेखि नै दरबन्दी थपको माग उठाइरहेका छौं।